Bu gün Tayvanda Computex beynəlxalq kompüter sərgisinin açılış mərasimi baş tutacaq.

İlk dəfə 1981-ci ildə keçirilən sərgi həmin vaxt lokal tədbir kimi təşəkkül tapıb. Hazırda isə Computex Almaniyada keçirilən CeBIT-dən sonra dünyanın ikinci ən iri informasiya texnologiyaları nailiyyətləri sərgisi, Asiyanın isə ən iri oxşar tədbiridir.  

Kompüter sənayesi sahəsində əlamətdar hadisə olan bu tədbir artıq uzun illərdir əksər şirkətlərin öz qabaqcıl məhsullarını və nailiyyətlərini ilk dəfə nümayiş etdirmək üçün imkan yaradır.

 

Bu dəfə Computex-də ümumilikdə 5400 pavilyonda təmsil olunan 1800-ə yaxın şirkət iştirak edəcək ki, bu da ötən ilkindən bir qədər çoxdur.

Təşkilatçılar beş gün ərzində sərgiyə azı 36 min nəfərin tamaşa edəcəyini, sahə peşəkarlarının isə 28 milyard dollar məbləğində kontrakt imzalaycağını düşünürlər.  

Bu il sərginin Windows 8 əməliyyat sisteminin idarəetməsi ilə işləyən çoxlu sayda nümayiş olunan planşet kompüterlərlə yadda qalacağı gözlənilir. Windows 8 ilə yanaşı, əsas diqqət mobil kompüter və internetə qoşulan qurğulara yönəldiləcək.

Sərgi işini iyunun 9-dək davam etdirəcək.