Azərbaycanın informasiya-kommunikasiya texnologiyaları sahəsində əldə etdiyi uğurlar “Caspian Telecoms 2012” 11-ci Beynəlxalq telekommunikasiya və informasiya texnologiyaları sərgi-konfransında təqdim ediləcəkdir.
ITE Turkey/EUF (Türkiyə), ITE Moscow LLC (Rusiya) və Iteca Caspian (Azərbaycan) beynəlxalq şirkətlərinin təşkilatçılığı ilə tədbir aprelin 19-da İstanbulda keçiriləcəkdir.
Sərgi-konfransda Azərbaycan, Türkiyə, Gürcüstan, Ukrayna, Rusiya, Qazaxıstan, Özbəkistan, Moldova, Monqolustan, Qırğızıstan və başqa ölkələrin iştirakı nəzərdə tutulmuşdur.
Tədbirdə Azərbaycanı Rabitə və İnformasiya Texnologiyaları Nazirliyi və bəzi telekommunikasiya şirkətləri təmsil edəcəkdir.
Nazirlikdən AzərTAc-a bildirmişlər ki, “Caspian Telecoms 2012”-nin işində dünyanın 35 ölkəsindən 400 nümayəndənin (avadanlıq istehsalçıları, rabitə operatorları, maliyyə strukturları, beynəlxalq təşkilatlar və s.) iştirakı gözlənilir. “Caspian Telecoms 2012” çərçivəsində keçiriləcək müzakirələr və məruzələr rabitə siyasəti, perspektiv texnologiyalar, qabaqcıl texnologiyaların tətbiqi və s. aktual məsələləri əhatə edəcəkdir.
“Caspian Telecoms” 2001-ci ildən keçirilir və hər il telekommunikasiya bazarının dünya liderlərini bir araya gətirir. Konfrans Xəzər regionunda, MDB ölkələrində, Türkiyədə və Mərkəzi Asiyada telekommunikasiya və informasiya texnologiyaları üzrə aparıcı forumdur.

http://azertag.com/