Barselonada keçirilən Mobile World Congress sərgisində Microsoft korporasiyası istifadəçilər üçün Windows 8 əməliyyat sisteminin ilkin versiyasını (Windows 8 Consumer Preview) nümayiş etdirib. Xatırladaq ki, ötən ilin sentyabrında korporasiya əməliyyat sisteminin tərtibatçılar (Developer Preview) üçün nəzərdə tutulan ilkin versiyasını göstərmişdi.

Windows bölməsinin prezidenti Stiven Sinofski bildirib ki, sentyabrdan ötən müddət ərzində Microsoft ƏS-yə “mindən çox dəyişiklik edib”. O, sistemin daha etibarlı olmasını, idarəetmə mexanizmlərinin tamamlanmasını, sistemin tərkibinə Windows Store əlavələr mağazasının daxil edilməsini qeyd edib.   

Windows 8-in ARM-planşetlərdə işləyə bilməsinə baxmayaraq, sistemin beta-versiyasını yalnız x86/64 prosessor arxitekturalı qurğularda (əsas etibarilə kompüterlərdə) quraşdırmaq mümkündür. Beta-versiya pulsuz yayılır, lakin məhdud vaxt ərzində işləyir.

Bir neçə dildə olan sistemi Microsoft-un saytından yükləmək olar.

Lenta-nın yazdığına görə, korporasiya nümayəndələri Windows 8-in sistem tələblərini də açıqlayıblar. Sistemə 1 giqahers və daha çox prosessor, 1 və ya 2 giqabayt operativ yaddaş və 16 yaxud 20 giqabayt disk tutumu, eləcə də DirectX9 ilə uyğunlaşan videokart daxildir.  

Microsoft-un saytında kompüterlərə Consumer Preview-nu yalnız “təcrübəli istifadəçilərin” yükləməsinin tövsiyə olunduğu bildirilir.