Dövlət başçısı qazanılmış qələbə münasibətilə voleybolçuları təbrik edərək deyib:

“Mən sizi ürəkdən salamlayıram və böyük qələbə münasibətilə ürəkdən təbrik edirəm. “Rabitə” voleybol komandası dünya çempionatında böyük uğur əldə edərək çempion adını qazanmışdır. Bu, böyük qələbədir. Sizin qələbənizdir. Azərbaycan idmanının qələbəsidir. Mən bu münasibətlə sizin hamınızı ürəkdən təbrik edirəm. Mən bilirəm ki, “Rabitə” komandası dünya miqyasında çox güclü komanda kimi özünü artıq təsdiq etmişdir. Keçən Avropa Çempionlar Liqasında final mərhələsinə gəlib çatmışdır. Bu qələbə isə bir daha komandanın gücünü göstərir və bizim hamımızı ürəkdən sevindirir.

Bütövlükdə Azərbaycanda idmanın voleybol növü çox uğurla və sürətlə inkişaf edir. Çox gözəl ənənələr vardır. Milli komandamız da yaxşı nəticələr göstərir və dünyanın ən güclü komandaları ilə bərabər səviyyədə oyun nümayiş etdirir. Qələbələr də var, məğlubiyyətlər də vardır. Klublar səviyyəsində isə vəziyyət daha da yaxşıdır. Bizim bir neçə gözəl klublarımız var və onların arasında əlbəttə, “Rabitə” komandası ən yüksək zirvəni fəth etmişdir.

Bir daha sizi ürəkdən təbrik edirəm. Siz bütün idman azarkeşlərini, Azərbaycan xalqını sevindirmisiniz. Bizim idmanla bağlı bütün təşəbbüslərimizin ən gözəl nəticəsi, bax, bu böyük qələbədir. Həm klubu, həm federasiyanı, idman mütəxəssislərini təbrik edirəm. Bu, ümumi qələbədir, əlbəttə ki, ilk növbədə oyunçuları təbrik edirəm”.

“Rabitə” klubunun kapitanı Nataliya Məmmədova müxtəlif yarışlarda voleybolçulara verdiyi dəstəyə və bütövlükdə Azərbaycanda voleybolun inkişafına göstərdiyi diqqətə görə Prezidentə idmançıların minnətdarlığını çatdırıb. Qeyd edib ki, komandanın uğuru bütün Azərbaycanın uğurudur. “Rabitə” komandasının dünya voleybol klubları arasında birinci yeri tutması isə voleybolçuların Azərbaycan idmanına töhfəsidir.

Komandanın kapitanı üzərində klub üzvlərinin imzası olan topu Prezident İlham Əliyevə hədiyyə edib.

Dövlət rəhbəri voleybolçuları müxtəlif dünya miqyaslı yarışlarda uğurla çıxış etdiyini vurğulayıb. Prezident İlham Əliyev Azərbaycanın voleybol ənənələrindən danışarkən bildirib ki, on bir il bundan əvvəl ölkədə yalnız bir voleybol klubu vardı, indi isə ölkə çempionatında yeddi güclü komanda iştirak edir. “Rabitə” klubunun qazandığı qələbə isə beynəlxalq miqyaslı komanda yarışlarında əldə edilən ən böyük nəticədir. Bu, onu göstərir ki, ölkəmizdə voleybol dünya səviyyəsindədir.

Voleybol üzrə milli komandanın baş məşqçisi Faiq Qarayev Azərbaycan voleybolunda uğurların təməlinin məhz dövlət başçısı tərəfindən qoyulduğunu vurğulayıb. O, Prezident İlham Əliyevin idmançılarla daim təmasda olmasını, onlara verdiyi dəstək və tövsiyələrin qazanılan qələbələrə xüsusi stimul verdiyini söylyib.

Faiq Qarayev voleybol üzrə milli yığma komandanın planları barədə də dövlət başçısına məlumat verib.

Prezident bildirib ki, idmanda əldə edilən uğurlar, həmçinin çoxlu sayda müasir Olimpiya İdman komplekslərinin istifadəyə verilməsi ölkədə yüksək səviyyəli yarışların keçirilməsinə geniş imkanlar açıb. Bu yaxınlarda Bakıda keçirilən boks üzrə dünya çempionatına toxunan dövlət başçısı bildirib ki, yüzdən çox ölkənin təmsil olunduğu yarışların yüksək səviyyədə təşkili bunu sübut edib.

Prezident İlham Əliyev klubun üzvlərini bir daha təbrik edib.

Görüşdən sonra xatirə şəkli çəkilib, AzərTac xəbər verir.

Onu da qeyd etmək lazımdır ki, Prezident İlham Əliyev “Rabitə” voleybol klubunun mükafatlandırılması haqqında sərəncam imzalayıb. Sərəncama əsasən, kluba 500 min manat ayrılıb.