 |
 |
| 28.01.2009 QAXDA RABİTƏ SİSTEMİ MÜASİRLƏŞDİRİLİR Qax, 27 yanvar (AzərTAc). Əhaliyə göstərilən rabitə xidmətlərinin keyfiyyətini daha da yaxşılaşdırmaq, habelə rabitə obyektlərində yeni texnologiyaların tətbiqini sürətləndirmək məqsədilə Qax Rayon Telekommunikasiya Qovşağı tərəfindən zəruri tədbirlər davam etdirilir. Son 5 ildə rayonun 9 kəndində elektron tipli yeni ATS-lər istifadəyə verilmiş, 300 nömrə tutumu olan yeni nəsil simsiz rabitə avadanlığı, habelə kəndlərdə Delta Telekoma məxsus peyk antenaları quraşdırılmışdır. Mərkəzi ATS-in şəhərlərarası rabitəsinin etibarlılığını yaxşılaşdırmaq məqsədilə rayon ərazisində 11,6 kilometr uzunluğunda yeni fibro kabel çəkilmiş, optik xətt avadanlığı quraşdırılaraq şəhərlərarası danışıq kanallarının sayı 60-a çatdırılmışdır. Həyata keçirilən tədbirlər nəticəsində son 5 ildə qovşaq üzrə telefon abunəçilərinin ümumi sayı 3.275 abonent artaraq 9.553-ə çatmışdır. 2004-2008-ci illərdə rayonda poçt şöbələrinin maddi-texniki bazasının möhkəmləndirilməsi istiqamətində də müvafiq tədbirlər həyata keçirilmiş, rayon mərkəzində, habelə 6 kənddə müasir standartlara uyğun yeni poçt binaları tikilib istifadəyə verilmişdir. |